ലോക വനിതാ ദിനത്തില്‍ 25 പെണ്‍കുട്ടികള്‍ക്ക് 25 ലക്ഷം രൂപയുടെ സ്‌കോളര്‍ഷിപ് നല്‍കി ഹസീന നിഷാദ്
ദുബായ്: ലോക വനിതാ ദിനത്തില്‍ മിടുക്കികളായ മക്കളുടെ പേരില്‍ അഭിമാനത്താല്‍ തലയുയര്‍ത്തി സ്‌കോളര്‍ഷിപ് സ്വീകരിക്കാന്‍ 25 പ്രവാസികള്‍ ദുബായിലെത്തി. യുഎഇയിലെ വിവിധ ഭാഗങ്ങളില്‍ ജോലി ചെയ്യുന്ന ഏറ്റവും അര്‍ഹരായ പ്രവാസികളുടെ നാട്ടില്‍ പഠിക്കുന്ന പെണ്‍കുട്ടികള്‍ക്കാണ് 25 ലക്ഷം രൂപയുടെ സ്‌കോളര്‍ഷിപ് വിതരണം ചെയ്തത്.
യുഎഇയിലെ പ്രമുഖ വനിതാ സംരംഭക ഹസീന നിഷാദിന്റെ നേതൃത്വത്തില്‍ ആരംഭിച്ച പെണ്‍കുട്ടികള്‍ക്ക് വേണ്ടിയുള്ള ‘അല്‍മിറ’ സ്‌കോളര്‍ഷിപ് കഴിഞ്ഞ ജനുവരി മാസത്തിലാണ് പ്രഖ്യാപിച്ചത്. ഇത്തവണ നാട്ടില്‍ ഹയര്‍ സെക്കണ്ടറി പൊതു പരീക്ഷ എഴുതുന്ന 25 പെണ്‍കുട്ടികള്‍ക്കാണ് ഒരു ലക്ഷം രൂപ വീതമുള്ള സ്‌കോളര്‍ഷിപ് ലഭിച്ചത്. ആയിരത്തോളം അപേക്ഷകരില്‍ നിന്നും പെണ്‍കുട്ടികള്‍ക്ക് പ്‌ളസ് വണ്ണില്‍ ലഭിച്ച മാര്‍ക്കിന്റെയും, യുഎഇയില്‍ ജോലി ചെയ്യുന്ന രക്ഷിതാവിന്റെ സാമ്പത്തിക സാഹചര്യവുവും പരിഗണിച്ചാണ് 25 പെണ്‍കുട്ടികളെ തെരഞ്ഞെടുത്തത്. ”എന്റെ മകള്‍ നന്നായി പഠിക്കും. അവള്‍ പഠിച്ച് നല്ലൊരു ജോലി നേടിയാല്‍ എന്റെ ബുദ്ധിമുട്ടുകളെല്ലാം അവസാനിക്കും” -കഴിഞ്ഞ 43 വര്‍ഷമായി പ്രവാസ ജീവിതം നയിക്കുന്ന ഇപ്പോള്‍ അബുദാബിയിലെ ഒരു വീട്ടില്‍ ജോലി ചെയ്യുന്ന ഖാലിദിന്റെ വാക്കുകളിലാണിത്.
”എന്റെ പ്രതീക്ഷ എന്റെ മകളിലാണ്. അവളുടെ വിദ്യാഭ്യാസത്തിന് വേണ്ടി എത്ര കാലം കഷ്ടപ്പെടാനും ഞാന്‍ തയാറാണ” -ഷാര്‍ജയില്‍ ഒരു ക്‌ളീനിംഗ് കമ്പനിയില്‍ ജോലി ചെയ്യുന്ന ജിജി പറഞ്ഞതാണിത്. ജീവിത സാഹചര്യംകൊണ്ട് തനിക്ക് പഠിക്കാന്‍ സാധിച്ചില്ലെങ്കിലും, മകള്‍ പഠിച്ചു ഒരു ഡോക്ടറായി കാണണമെന്നാണ് ആഗ്രഹമെന്ന് ഷാര്‍ജയില്‍ ഒരു ആയുര്‍വേദിക് സെന്ററില്‍ ജോലി ചെയ്യുന്ന ഉണ്ണികൃഷ്ണന്‍ പറഞ്ഞു.
”സ്‌കോളര്‍ഷിപ് സ്വീകരിക്കാന്‍ എത്തിയ ഓരോ രക്ഷിതാവിനും മകളെ കുറിച്ച് സ്വപ്നങ്ങളുണ്ട്. അതുകൊണ്ടാണ് പെണ്‍കുട്ടികളുടെ പുരോഗമനം വിദ്യാഭ്യാസത്തിലൂടെ എന്ന ആശയം ഉള്‍ക്കൊണ്ട് ഞങ്ങളുടെ മകളുടെ പേരിലുള്ള ‘അല്‍മിറ’ സ്‌കോളര്‍ഷിപ് ഈ വനിതാ ദിനത്തില്‍ വിതരണം ചെയ്തത്” -വേള്‍ഡ് സ്റ്റാര്‍ ഹോള്‍ഡിംഗ് എംഡി ഹസീന നിഷാദ് പറഞ്ഞു.
പെണ്‍കുട്ടികളെ എത്രയും പെട്ടന്ന് കല്യാണം കഴിപ്പിച്ച് പറഞ്ഞയക്കുകയെന്ന ചിന്തയില്‍ നിന്നും ഭൂരിഭാഗം പ്രവാസികളും മാറിയെന്നതിന്റെ ഏറ്റവും മികച്ച തെളിവായിരുന്നു ഞങ്ങള്‍ ഈ സ്‌കോളര്‍ഷിപ് പ്രഖ്യാപിച്ചപ്പോള്‍ ലഭിച്ച പ്രതികരണമെന്ന് കമ്പനി ചെയര്‍മാന്‍ നിഷാദ് ഹുസൈന്‍ പറഞ്ഞു. ദുബൈ ക്രൗണ്‍ പ്‌ളാസ ഹോട്ടലില്‍ നടന്ന ചടങ്ങിലാണ് സ്‌കോളര്‍ഷിപ്പുകള്‍ വിതരണം ചെയ്തത്.
