ആസ്റ്റര്‍ ഫാര്‍മസി-ഡോ. റെഡ്ഡീസ് സഹകരണം
ഗ്യാസ്‌ട്രോ എന്ററോളജി, പെയിന്‍ മാനേജ്‌മെന്റ്, കാര്‍ഡിയോ വാസ്‌കുലാര്‍ ഡിസീസ്, ആന്റി ഹിസ്റ്റാമൈന്‍സ് തുടങ്ങി വിവിധ തെറാപ്പി വിഭാഗങ്ങളിലെ കുറിപ്പടി മരുന്നുകള്‍ യുഎഇയിലും ജിസിസിയിലും വിപണനം ചെയ്യാനാണ് സംവിധാനം.
ദുബായ്: ജിസിസിയിലെ പ്രമുഖ ഫാര്‍മസി ശൃംഖലയായ ആസ്റ്റര്‍ ഡിഎം ഹെല്‍ത് കെയറിന്റെ റീടെയില്‍ വിഭാഗമായ ആസ്റ്റര്‍ ഫാര്‍മസി ഹൈദരാബാദ് ആസ്ഥാനമായ ആഗോള ഫാര്‍മസ്യൂട്ടിക്കല്‍ കമ്പനി ഡോ.റെഡ്ഡീസ് ലബോറട്ടറീസ് ഇന്ത്യാ ലിമിറ്റഡുമായി സഹകരണ കരാറില്‍ ഒപ്പു വെച്ചു. എല്ലാവര്‍ക്കും പ്രാപ്യമാകുന്ന ഗുണനിലവാരമുള്ള മരുന്നുകള്‍ ജിസിസി മേഖലയില്‍ എളുപ്പത്തില്‍ ലഭ്യമാക്കാനാണ് കരാര്‍. കരാര്‍ പ്രകാരം, ഡോ. റെഡ്ഡീസ് ആസ്റ്റര്‍ ഫാര്‍മസിയുടെ വിപണന, വിതരണ വിഭാഗമായ ആല്‍ഫ വണ്ണിനായി തെറാപ്പി മേഖലയില്‍ മരുന്നുകള്‍ നിര്‍മിക്കുകയും വിപണനം നടത്തുകയും ചെയ്യും. ആല്‍ഫ വണ്‍ യുഎഇയിലുടനീളവും ജിസിസിയിലെ എല്ലായിടത്തും ഈ മരുന്നുകള്‍ വിതരണം ചെയ്യും. ഈയിടെ ദുബായില്‍ നടന്ന ആഗോള ആരോഗ്യ സംരക്ഷണ പ്രദര്‍ശനമായ അറബ് ഹെല്‍ത്തിലാണ് ഇരു സ്ഥാപനങ്ങളും തമ്മില്‍ ഈ കരാറില്‍ ഒപ്പു വെച്ചത്.
”ഞങ്ങളുടെ ഹെല്‍ത് കെയര്‍ സേവനങ്ങളിലൂടെയും ഉല്‍പന്നങ്ങളിലൂടെയും ഞങ്ങള്‍ സേവിക്കുന്ന സമൂഹത്തിന് മികച്ച മെഡിക്കല്‍ സഹായം എത്തിക്കാന്‍ സാധിക്കുന്നുവെന്ന് ആസ്റ്റര്‍ വിശ്വസിക്കുന്നതായി ആസ്റ്റര്‍ ഡിഎം ഹെല്‍ത് കെയര്‍ സ്ഥാപക ചെയര്‍മാനും എംഡിയുമായ ഡോ. ആസാദ് മൂപ്പന്‍ പറഞ്ഞു. പ്രശസ്ത ഫാര്‍മസ്യൂട്ടിക്കല്‍ നിര്‍മാതാക്കളുമായുള്ള സഹകരണം ഈ ലക്ഷ്യം കൈവരിക്കുന്നതിന് ആസ്റ്ററിനെ സഹായിക്കുമെന്ന് കരുതുന്നുവെന്നും അദ്ദേഹം വ്യക്തമാക്കി.
ആസ്റ്ററില്‍ ഓരോ വര്‍ഷവും ഏകദേശം 20 ദശലക്ഷം രോഗികള്‍ക്ക് സേവനം നല്‍കുന്നു. അവരുടെ ആവശ്യങ്ങള്‍ക്കനുസരിച്ച് മികച്ച പരിചരണം നല്‍കുകയാണ് ഇതിലൂടെ ലക്ഷ്യമിടുന്നതെന്നും ആസ്റ്റര്‍ ഡിഎം ഹെല്‍ത് കെയര്‍ ഡെപ്യൂട്ടി മാനേജിംഗ് ഡയറക്ടര്‍ അലീഷ മൂപ്പന്‍ പറഞ്ഞു.
യുഎഇയുമായും ജിസിസിയുമായും അടുത്ത ബിസിനസ് ബന്ധമാണുള്ളതെന്ന് എപിഐ ആന്റ് സര്‍വീസസ്, ഡോ. റെഡ്ഡീസ് ലബോറട്ടറീസ് ഇന്ത്യ സിഇഒ ദീപക് സപ്ര പറഞ്ഞു. തങ്ങളുടെ ഉയര്‍ന്ന നിലവാരമുള്ളതും വിശ്വസനീയവുമായ ഉല്‍പന്നങ്ങള്‍ ഉപയോഗിച്ച് മേഖലയിലെ കൂടുതല്‍ രോഗികള്‍ക്ക് സേവനമെത്തിക്കാനുള്ള ഈ അവസരത്തെ ഏറെ വിലമതിക്കുന്നുവെന്നും അദ്ദേഹം അഭിപ്രായപ്പെട്ടു. ഒരു സമാന്തര സംയോജിത കമ്പനി എന്ന നിലയില്‍, ഡോ. റെഡ്ഡീസ് ആക്റ്റീവ് ഫാര്‍മസ്യൂട്ടിക്കല്‍ ഇന്‍ഗ്രീഡിയന്റ് (എപിഐ) നിര്‍മിക്കും. യു.എസ്, യൂറോപ് തുടങ്ങിയ മറ്റ് സുപ്രധാന വിപണികളിലെ റഗുലേറ്ററി അഥോറിറ്റികള്‍ അംഗീകരിച്ച സംവിധാനങ്ങളിലാണ് ഇവ നിര്‍മിക്കുകയെന്നും അദ്ദേഹം വ്യക്തമാക്കി. ആസ്റ്റര്‍ പോലുള്ള ഒരു ശക്തമായ പങ്കാളിയുടെ വിപണന, വിതരണ ശൃംഖലയുമായി സഹകരിക്കുന്നതോടെ, 2030ഓടെ 1.5 ബില്യണിലധികം രോഗികളിലേക്ക് സേവനമെത്തിക്കുക ലക്ഷ്യത്തിലേക്ക് മുന്നേറാന്‍ സാധിക്കുമെന്നും ദീപക് സപ്ര കൂട്ടിച്ചേര്‍ത്തു.
ആസ്റ്റര്‍ ഡിഎം ഹെല്‍ത്ത് കെയറിന് കീഴില്‍ നിലവില്‍ 245 ഫാര്‍മസികളാണ് ജിസിസിയില്‍ പ്രവര്‍ത്തിക്കുന്നത്. ആസ്റ്റര്‍ ഫാര്‍മസി ഇന്ന് പ്രാദേശിക, അന്തര്‍ദേശീയ പ്രശസ്തിയുള്ള 85 ബ്രാന്‍ഡുകള്‍ വിപണനം ചെയ്യുന്നു.
