150 സ്ത്രീ തൊഴിലാളികള്‍ക്കായി ആസ്റ്റര്‍ വോളണ്ടിയേഴ്‌സ് ക്യാമ്പ് സംഘടിപ്പിച്ചു
താഴ്ന്ന വരുമാനക്കാരായ സ്ത്രീകളുടെ ആരോഗ്യവും ക്ഷേമവും ലക്ഷ്യമിട്ടായിരുന്നു അന്താരാഷ്ട്ര വനിതാ ദിന ഭാഗമായി പ്രോഗ്രാം നടത്തിയത്.
ആസ്റ്റര്‍ വോളണ്ടിയേഴ്‌സ് ദിവ 3.0 പ്രിവിലേജ് കാര്‍ഡുകള്‍ ആസ്റ്റര്‍, ആക്‌സസ് സ്ഥാപനങ്ങളില്‍ അവതരിപ്പിച്ചു.
ദുബായ്: ജിസിസിയിലെയും ഇന്ത്യയിലെയും ഏറ്റവും വലിയ സംയോജിത ആരോഗ്യ പരിചരണ സേവന ശൃംഖലകളിലൊന്നായ ആസ്റ്റര്‍ ഡിഎം ഹെല്‍ത് കെയറിന്റെ ആഗോള സിഎസ്ആര്‍ മുഖമായ ആസ്റ്റര്‍ വോളണ്ടിയേഴ്‌സ് അന്താരാഷ്ട്ര വനിതാ ദിനത്തോടനുബന്ധിച്ച് ദുബായ് സോനാപൂരിലെ ആസ്റ്റര്‍ ഹോസ്പിറ്റല്‍ മുഹൈസ്‌നയില്‍ മള്‍ടി സ്‌പെഷ്യാലിറ്റി മെഡിക്കല്‍, വെല്‍നസ് ക്യാമ്പ് സംഘടിപ്പിച്ചു. ജെംസ്, അബേല കോ, അല്‍ഗുറൈര്‍, ഇനോക് എന്നിവയുടെ സോനാപൂര്‍ ക്യാമ്പുകളിലെ താഴ്ന്ന വരുമാനക്കാരായ 150 സ്ത്രീ തൊഴിലാളികള്‍ക്ക് ഈ ഉദ്യമം പ്രയോജനം ചെയ്തു.
കഴിഞ്ഞ കുറച്ചു വര്‍ഷങ്ങളായി വിവിധ യത്‌നങ്ങളിലൂടെ അധഃസ്ഥിത സ്ത്രീകളെ ശാക്തീകരിക്കുന്നതില്‍ ആസ്റ്റര്‍ വോളണ്ടിയേഴ്‌സ് ദിവ പ്രോഗ്രാം മുന്‍നിരയിലാണ്. ഇതു വരെ 500ലധികം സ്ത്രീകള്‍ക്ക് ഇതിന്റെ പ്രയോജനം ലഭിച്ചിട്ടുണ്ട്. ഈ വര്‍ഷത്തെ മൂന്നാം എഡിഷനോടെ തങ്ങളുടെ കുടുംബങ്ങള്‍ക്ക് നാട്ടിലേക്ക് മടങ്ങാനായി കഠിനാധ്വാനം ചെയ്യുന്ന താഴ്ന്ന വരുമാനക്കാരായ സ്ത്രീകളെ ആരോഗ്യ പരിശോധനകള്‍ നടത്താനുള്ള ശ്രമത്തിന് സജ്ജരാക്കുന്നതില്‍ പ്രോഗ്രാം പ്രത്യേക ശ്രദ്ധ ചെലുത്തി. യുഎഇയിലെ ആസ്റ്റര്‍ സ്ഥാപനങ്ങളില്‍ നിന്നുള്ള ഡോക്ടര്‍മാരും ജീവനക്കാരും മെഡിക്കല്‍, വെല്‍നസ് ക്യാമ്പിന് നേതൃത്വം നല്‍കി. മുഴുവന്‍ ആസ്റ്റര്‍, ആക്‌സസ് സ്ഥാപനങ്ങളിലും മെഡിക്കല്‍ ബില്ലുകളില്‍ നിരക്കിളവ് ലഭിക്കാന്‍ ഉപയോഗിക്കാവുന്ന പ്രത്യേക പ്രിവിലേജ് കാര്‍ഡുകളും ക്യാമ്പില്‍ സ്ത്രീകള്‍ക്ക് സമ്മാനിച്ചു.
ക്യാമ്പില്‍ പങ്കെടുത്ത സ്ത്രീകളില്‍ പലരും സ്വന്തം കുടുംബത്തിനും സമൂഹത്തിനും ആരോഗ്യകരമായ ജീവിതം സമ്മാനിക്കാന്‍ പ്രയത്‌നിക്കുന്നവരാണ്. മികച്ച ആരോഗ്യം ഏതൊരു കുടുംബത്തിന്റെയും സമൂഹത്തിന്റെയും നട്ടെല്ലാണെന്നും ഈ ഉദ്യമത്തെ കുറിച്ച് സംസാരിച്ച ആസ്റ്റര്‍ ഡിഎം ഹെല്‍ത് കെയര്‍ ഡെപ്യൂട്ടി മാനേജിംഗ് ഡയറക്ടര്‍ അലീഷ മൂപ്പന്‍ പറഞ്ഞു. പ്രാഥമിക പരിശോധനാ സേവനങ്ങളിലേക്കുള്ള അവരുടെ പ്രവേശനം എളുപ്പം സാധ്യമാക്കാനാവുകയെന്നത് ബഹുമതിയായി കാണുന്നു. ഇതിലൂടെ അവര്‍ അഭിമുഖീകരിക്കുന്ന ഏത് ആരോഗ്യ പ്രശ്‌നങ്ങളും പരിഹരിക്കാനാകുമെന്ന് പ്രതീക്ഷിക്കുന്നതായും അലീഷ മൂപ്പന്‍ വ്യക്തമാക്കി.
ബേസിക് സ്‌ക്രീനിംഗ്, ഒബിജി കണ്‍സള്‍ട്ടേഷന്‍, ഡെര്‍മറ്റോളജി കണ്‍സള്‍ട്ടേഷന്‍, ഒപ്റ്റികല്‍ സ്‌ക്രീനിംഗ്, ജിപി കണ്‍സള്‍ട്ടേഷന്‍ തുടങ്ങിയ സേവനങ്ങള്‍ നല്‍കുന്ന മെഡിക്കല്‍ ക്യാമ്പോടെയാണ് പരിപാടി ആരംഭിച്ചത്. തുടര്‍ന്ന് സ്ത്രീകള്‍ക്കായി സംഗീത-വിനോദ പരിപാടികള്‍, ഗെയിമുകള്‍, വെല്‍നസ് പ്രോഗ്രാമുകള്‍ എന്നിവയും സംഘടിപ്പിക്കപ്പെട്ടു. സ്ത്രീകള്‍ക്കായി ബേസിക് ലൈഫ് സേവിംഗ് (ബിഎല്‍എസ്) പരിശീലന സെഷനും ഒരുക്കിയിരുന്നു.
കഴിഞ്ഞ 6 വര്‍ഷത്തിനിടയില്‍ 4.25 ദശലക്ഷത്തിലധികം ആളുകളിലേക്ക് സഹായമെത്തിച്ച 53,000ത്തിലധികം സന്നദ്ധ പ്രവര്‍ത്തകര്‍ നയിക്കുന്ന ആഗോള പ്രസ്ഥാനമായി ആസ്റ്റര്‍ വോളണ്ടിയേഴ്‌സ് ഉയര്‍ന്നു വന്നിട്ടുണ്ട്. ഈയിടെ 36-ാം സ്ഥാപക ദിനത്തോടനുബന്ധിച്ച് ആസ്റ്റര്‍ വോളണ്ടിയേഴ്‌സ് സംഘടിപ്പിച്ച ‘കൈന്‍ഡ്‌നസ് ഈസ് എ ഹാബിറ്റ്’ എന്ന കാമ്പയിന്‍ ഭാഗമായി ആസ്റ്റര്‍ ഡിഎം ഹെല്‍ത് കെയര്‍ 7 രാജ്യങ്ങളിലായി 1000 നിരക്കിളവുളള ശസ്ത്രക്രിയകള്‍ പ്രഖ്യാപിച്ചിരിക്കുകയാണ്.
