യുപിയില്‍ 5,000 കോടി കൂടി നിക്ഷേപിക്കാനൊരുങ്ങി ലുലു ഗ്രൂപ്; നോയിഡയിലുള്‍പ്പെടെ 4 പുതിയ മാളുകള്‍ കൂടി നിര്‍മിക്കും
ദുബായ്: ലഖ്‌നൗവില്‍ നടക്കുന്ന യുപി ആഗോള നിക്ഷേപക ഉച്ചകോടിയില്‍ 25,000ത്തിലധികം പേര്‍ക്ക് പുതിയ തൊഴിലവസരം നല്‍കി യുഎഇ ആസ്ഥാനമായ ലുലു ഗ്രൂപ്പിന്റെ വമ്പന്‍ പ്രഖ്യാപനം.
വാരാണസിക്കും പ്രയാഗ് രാജിനും പുറമെ അയോധ്യ, നോയിഡ എന്നിവിടങ്ങളിലാണ് പുതിയ പദ്ധതികള്‍. നോയിഡയില്‍ ലുലു മാളും ഹോട്ടലും നിര്‍മിക്കും. 6,000 പേര്‍ക്ക് നേരിട്ട് തൊഴില്‍ ലഭിക്കും. 2,500 കോടി രൂപയാണ് നോയിഡയില്‍ ലുലു നിക്ഷേപിക്കാനൊരുങ്ങുന്നത്. നോയിഡ സെക്ടര്‍ 108ല്‍ 20 ഏക്കര്‍ സ്ഥലമാണ് നോയിഡ അഥോറിറ്റി ലുലു ഗ്രൂപ്പിന് കൈമാറുന്നത്. മൂന്നു വര്‍ഷത്തിനുള്ളില്‍ പദ്ധതി പൂര്‍ത്തിയാക്കാനാണ് ഉദ്ദേശിക്കുന്നതെന്ന് ചെയര്‍മാന്‍ എം.എ യൂസഫലി പറഞ്ഞു.
500 കോടി രൂപ നിക്ഷേപത്തിലുള്ള ഭക്ഷ്യ സംസ്‌കരണ കേന്ദ്രത്തിന്റെ നിര്‍മാണ പ്രവര്‍ത്തനങ്ങള്‍ പുരോഗമിച്ചു വരികയാണ്. 20 ഏക്കറില്‍ ഉയരുന്ന ഫുഡ് പാര്‍ക്കിലൂടെ 1,700 പേര്‍ക്കാണ് നേരിട്ട് തൊഴില്‍ ലഭിക്കുന്നത്. ഇതോടൊപ്പം, കര്‍ഷകര്‍ക്ക് ഉല്‍പന്നങ്ങള്‍ മികച്ച വിലയില്‍ ഇവിടെ നേരിട്ട് വില്‍ക്കാനാകും. ഗള്‍ഫ് മേഖലയിലേക്ക് ഈ ഉല്‍പന്നങ്ങള്‍ നേരിട്ട് കയറ്റുമതി ചെയ്യുന്ന ചെയിന്‍ പദ്ധതിയാണ് ലുലു ലക്ഷ്യമിടുന്നത്.
പ്രധാനമന്ത്രി നരേന്ദ്ര മോദി ഉദ്ഘാടനം ചെയ്ത ആഗോള നിക്ഷേപക സംഗമത്തിലാണ് യുപിയിലെ പുതിയ പദ്ധതികള്‍ക്ക് ധാരണയായത്. യുപിയുടെ വികസന മുന്നേറ്റത്തിന് കരുത്തു പകരുന്നതാണ് ലുലു ഗ്രൂപ്പിന്റെ ഈ പ്രഖ്യാപനം.
ലഖ്‌നൗ മാളിന്റെ പ്രവര്‍ത്തനം ഏഴ് മാസം പിന്നിട്ടതിന് പിന്നാലെയാണ് തീരുമാനമെന്ന് എം.എ യൂസഫലി വ്യക്തമാക്കി. ഇതിനകം ഒരു കോടി 12 ലക്ഷം പേരാണ് മാള്‍ സന്ദര്‍ശിച്ചത്.
യുഎഇ പ്രതിനിധികളുമായി യുപി മുഖ്യമന്ത്രി കൂടിക്കാഴ്ച നടത്തി
ആഗോള നിക്ഷേപ സംഗമത്തില്‍ യുഎഇ പ്രതിനിധികളുമായി യുപി മുഖ്യമന്ത്രി യോഗി ആദിത്യനാഥ് കൂടിക്കാഴ്ച നടത്തി. യുഎഇയും ഉത്തര്‍ പ്രദേശും തമ്മിലുള്ള വാണിജ്യ-വ്യവസായ രംഗത്തെ നിക്ഷേപവുമായി ബന്ധപ്പെട്ട കാര്യങ്ങള്‍ യോഗത്തില്‍ ചര്‍ച്ച ചെയ്തു.
യുഎഇ വിദേശ കാര്യ സഹ മന്ത്രി അഹമ്മദ് ബിന്‍ അലി അല്‍ സയേഗ്, യുഎഇ വ്യാപാര സഹ മന്ത്രി ഡോ. ഥാനി ബിന്‍ അഹ്മദ് അല്‍ സിയൂദി, ഫെഡറേഷന്‍ ഓഫ് യുഎഇ ചേംബേഴ്‌സ് പ്രസിഡന്റ് അബ്ദുല്ല അല്‍ മസ്‌റൂഇ, ലുലു ഗ്രൂപ് ചെയര്‍മാന്‍ എം.എ യൂസഫലി എന്നിവരുള്‍പ്പെടുന്ന യുഎഇ സംഘവുമായിട്ടാണ് മുഖ്യമന്ത്രി ചര്‍ച്ച നടത്തിയത്.
ആഗോള നിക്ഷേപക സംഗമത്തിന്റെ സ്മരണാര്‍ത്ഥം യുഎഇ മന്ത്രിമാരായ അഹ്മദ് ബിന്‍ അലി അല്‍ സയേഗ്, ഡോ. ഥാനി അല്‍ സിയൂദി എന്നിവര്‍ ഉച്ചകോടി നടക്കുന്ന വൃന്ദാവന്‍ മൈതാനിയില്‍ വൃക്ഷത്തൈകള്‍ നട്ടു.
മൂന്ന് ദിവസത്തെ നിക്ഷേപക സംഗമം ഞായറാഴ്ച സമാപിക്കും.
