കാന്‍സര്‍ രോഗികളെ സഹായിക്കാന്‍ ‘മേഴ്‌സിത്തോണ്‍’ 19ന് ക്രീക്ക് പാര്‍ക്കില്‍
ദുബായ് സെന്റ് മേരീസ് കത്തോലിക്ക ചര്‍ച്ച് സംഘടിപ്പിക്കുന്ന കൂട്ട നടത്തത്തില്‍ 15,000 പേര്‍ പങ്കെടുക്കും
ദുബായ്: ഗള്‍ഫിലെ ഏറ്റവും വലിയ കത്തോലിക്ക ദേവാലയമായ ദുബായ് സെന്റ് മേരീസ് കത്തോലിക്ക ചര്‍ച്ച് ‘മേഴ്‌സിത്തോണ്‍’ എന്ന പേരില്‍ കൂട്ട നടത്തം സംഘടിപ്പിക്കുന്നു. നിര്‍ധന കാന്‍സര്‍ രോഗികളുടെ ചികിത്സക്ക് സാമ്പത്തിക സഹായം കണ്ടെത്താനായാണിത്. ഫെബ്രുവരി 19ന് ദുബായ് ക്രീക്ക് പാര്‍ക്കില്‍ നടക്കുന്ന കൂട്ട നടത്തത്തില്‍ 15,000 പേര്‍ പങ്കെടുക്കും.
ലോക കാന്‍സര്‍ ദിനാചരണ ഭാഗമായി ഞായറാഴ്ച രാവിലെ 8 മുതല്‍ 4 വരെ ദുബായ് ക്രീക്ക് പാര്‍ക്കില്‍ സെന്റ് മേരീസ് കത്തോലിക്ക പള്ളിയിലെ സമരിറ്റന്‍ കൂട്ടായ്മയാണ് കാന്‍സറിനെതിരായ ജനകീയ നടത്തം സംഘടിപ്പിക്കുന്നതെന്ന് ഇടവക വികാരി ഫാ.ലെനി കോന്നൂലി വാര്‍ത്താ സമ്മേളനത്തില്‍ പറഞ്ഞു. 2017ല്‍ പള്ളിയുടെ 50-ാം വാര്‍ഷികത്തോടനുബന്ധിച്ച് ആദ്യ ‘മേഴ്‌സിത്തോണ്‍’ സംഘടിപ്പിച്ചിരുന്നു. അന്ന് ആറ് കാന്‍സര്‍ രോഗികളുടെ ചികിത്സയ്ക്കാണ് പണം സമാഹരിച്ചത്. എന്നാല്‍, ഇത്തവണ 60 കാന്‍സര്‍ രോഗികളുടെ ചികിത്സ ലക്ഷ്യമിടുന്നു.
ഇന്ത്യ, പാകിസ്താന്‍, ഫിലിപ്പീന്‍സ്, ലബനാന്‍ തുടങ്ങിയ രാജ്യങ്ങളില്‍ നിന്നുള്ള വ്യത്യസ്ത മതക്കാരായ 60 കാന്‍സര്‍ രോഗികളുടെ ചികിത്സയ്ക്കായി 38 ലക്ഷം ദിര്‍ഹം വേണ്ടി വരും. ഇതിന്റെ ഭാഗമായാണ് ‘എ വാക് ഫോര്‍ ഹോപ്’ എന്ന സന്ദേശവുമായുള്ള നടത്തം.
ദുബായ് ഗവണ്‍മെന്റിലെ വിവിധ വകുപ്പുകളുമായി സഹകരിച്ചാണ് ഈ കാരുണ്യ സംരംഭം. ചടങ്ങില്‍ മുതിര്‍ന്ന ഗവണ്‍മെന്റുദ്യോഗസ്ഥര്‍ സംബന്ധിക്കും. സംഗീത-നൃത്ത പരിപാടികളും മല്‍സരങ്ങളും നറുക്കെടുപ്പുകളുമുണ്ടാകും. ഭക്ഷണ സ്റ്റാളുകളും ഒരുക്കുന്നതാണ്.
ടിക്കറ്റുകള്‍ മുതിര്‍ന്നവര്‍ക്ക് 50 ദിര്‍ഹമിനും 4 മുതല്‍ 17 വയസ് വരെ പ്രായമുള്ള കുട്ടികള്‍ക്ക് 30 ദിര്‍ഹമിനും ലഭിക്കുന്നതാണ്. നാലു വയസ്സിന് താഴെയും 70 വയസ്സിന് മുകളിലും പ്രായമുള്ളവര്‍ക്ക് പ്രവേശനം സൗജന്യമാണ്.
വാര്‍ത്താ സമ്മേളനത്തില്‍ റോഡോള്‍ഫോ സംബന്ധിച്ചു. സമരിറ്റന്‍ കൂട്ടായ്മയിലെ സൂസന്‍ ജോസ്, ജൊഹാന ഫെര്‍ണാണ്ടസ്, സെലീന്‍ ഫെര്‍ണാണ്ടസ് എന്നിവരും സന്നിഹിതരായിരുന്നു
