ദുബായ് സൗത്തില്‍ ലുലു ഹൈപര്‍ മാര്‍ക്കറ്റ് തുറന്നു
ദുബായ്: ദുബായ് ഏവിയേഷന്‍ സിറ്റി, ലോജിസ്റ്റിക്‌സ് എന്നിവയില്‍ കേന്ദ്രീകരിക്കുന്ന ദുബായിലെ ഏറ്റവും വലിയ നഗര പദ്ധതിയായ ദുബായ് സൗത്തില്‍ ലുലു ഗ്രൂപ്പിന്റെ ഏറ്റവും പുതിയ ഹൈപര്‍ മാര്‍ക്കറ്റ് പ്രവര്‍ത്തനമാരംഭിച്ചു.
ദുബായ് ഏവിയേഷന്‍ സിറ്റി കോര്‍പറേഷന്‍ എക്‌സിക്യൂട്ടിവ് ചെയര്‍മാന്‍ ഖലീഫ അല്‍ സഫിനാണ് ലുലു ഗ്രൂപ് ചെയര്‍മാന്‍ എം.എ യൂസഫലിയുടെ സാന്നിധ്യത്തില്‍ 248-ാമത്തെ ഹൈപര്‍ മാര്‍ക്കറ്റിന്റെ ഉദ്ഘാടനം നിര്‍വഹിച്ചത്.
വിപുലമായ സൂപര്‍ മാര്‍ക്കറ്റ്, ഫ്രഷ് ഫുഡ്, ഗാര്‍ഹിക ഉത്പന്നങ്ങള്‍, ലുലു കണക്ട്, ഫാഷന്‍ ഉള്‍പ്പെടെ ഏറ്റവും നൂതനമായ സംവിധാനത്തോടെയാണ് ഹൈപര്‍ മാര്‍ക്കറ്റ് ക്രമീകരിച്ചിരിക്കുന്നത്.
ദുബായ് എമിറേറ്റിലെ ഏറ്റവും വലിയ നഗര പദ്ധതിയായ ദുബായ് സൗത്തില്‍ പുതിയ ഹൈപര്‍ മാര്‍ക്കറ്റ് ആരംഭിച്ചതില്‍ സന്തോഷമുണ്ടെന്ന് എം.എ യൂസഫലി പറഞ്ഞു. ഇതിനായുള്ള സൗകര്യങ്ങള്‍ ചെയ്തു തന്ന ദുബായ് ഭരണാധികാരികള്‍ക്ക് നന്ദി പറയുന്നു.
യുഎഇയിലെ ഏറ്റവും പ്രമുഖ ഹൈപര്‍ മാര്‍ക്കറ്റ് ഗ്രൂപ്പായ ലുലുവുമായി ചേര്‍ന്ന് പ്രവര്‍ത്തിക്കാനായതില്‍ സന്തോഷമുണ്ടെന്ന് ദുബായ് സൗത്ത് വക്താവ് അറിയിച്ചു. ദുബായ് സൗത്തിലെ താമസക്കാര്‍ക്ക് ഏറ്റവും മികച്ച സൗകര്യങ്ങള്‍ ഏര്‍പ്പെടുത്തുന്നതില്‍ തങ്ങള്‍ ശ്രദ്ധാലുക്കളാണെന്നും വക്താവ് കൂട്ടിച്ചേര്‍ത്തു.
പുതിയ ഹൈപര്‍ മാര്‍ക്കറ്റ് ദുബായ് റസിഡന്‍ഷ്യല്‍ ഡിസ്ട്രിക്ടിലെ വര്‍ധിച്ചു വരുന്ന വിവിധ രാജ്യക്കാരായ ജനസമൂഹത്തിനും സമീപ പ്രദേശങ്ങളിലുള്ളവര്‍ക്കും ഏറെ ഉപകാരപ്രദമാകും.
‘ദുബായ് സൗത്ത്’ എന്ന് പുനര്‍നാമകരണം ചെയ്യപ്പെട്ട ദുബായ് വേള്‍ഡ് സെന്‍ട്രല്‍ എയര്‍പോര്‍ട്ട് 145 ചതുരശ്ര കിലോമീറ്ററില്‍ ഉരുത്തിരിഞ്ഞു വരുന്ന ഒരു നഗര സമുച്ചയമാണ്. ഒരു ദശലക്ഷം ജനസംഖ്യയെ ഉള്‍ക്കൊള്ളാന്‍ ശേഷിയുള്ളതാണ് ‘ദുബായ് സൗത്ത്’.
2006ല്‍ ആരംഭിച്ച ദുബായിയുടെ ഈ ഉപ നഗര സംവിധാനം ‘ദുബായ് പ്‌ളാന്‍ 2021’ല്‍ വിവരിച്ചിരിക്കുന്ന നഗര സാമൂഹിക തീമുകള്‍ പ്രകടമാക്കുന്നതാണ്. യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂമിന്റെ കാഴ്ചപ്പാട് ഉള്‍ക്കൊള്ളുന്നതാണ് നഗരം.
സന്തോഷകരവും സര്‍ഗാത്മകവും ശാക്തീകരിക്കപ്പെട്ടതുമായ ജീവിത രീതി അനുവര്‍ത്തിക്കുന്നവരുടെ നഗരമാക്കി ഈ പ്രദേശത്തെ മാറ്റുകയാണ് പദ്ധതിയിലൂടെ ലക്ഷ്യമിടുന്നത്. ജീവിക്കാനും ജോലി ചെയ്യാനും നിക്ഷേപിക്കാനും ഇഷ്ടപ്പെടുന്ന സ്ഥലമായും ആഗോള സമ്പദ് വ്യവസ്ഥയിലെ ഒരു സുപ്രധാന കേന്ദ്രമായും ഇവിടം മാറുകയാണ്.
ദുബായ് സൗത്ത് സാമ്പത്തിക പ്‌ളാറ്റ്‌ഫോം എല്ലാ തരം വ്യവസായത്തെയും പിന്തുണക്കും. ലോകത്തിലെ ഏറ്റവും വലിയ വിമാനത്താവളമാകാന്‍ പോകുന്ന അല്‍ മക്തൂം ഇന്റര്‍നാഷണല്‍ എയര്‍പോര്‍ട്ടും ദുബായ് സൗത്തിനെ ശക്തിപ്പെടുത്തും. ദുബായ് എക്‌സ്‌പോ സിറ്റിയുടെ 5 കിലോമീറ്റര്‍ പരിധിക്കുള്ളിലാണ് ലുലുവിന്റെ പുതിയ ദുബായ് സൗത്ത് ഹൈപര്‍ മാര്‍ക്കറ്റ് നിലകൊള്ളുന്നത്.
ലുലു ഗ്രൂപ് ചീഫ് എക്‌സിക്യൂട്ടിവ് ഓഫിസര്‍ സൈഫി രൂപാവാല, എക്‌സിക്യൂട്ടിവ് ഡയറക്ടര്‍ എം.എ അഷ്‌റഫ് അലി, ലുലു ഗ്രൂപ് ഡയറക്ടര്‍ എം.എ സലീം, റീജ്യണല്‍ ഡയറക്ടര്‍ തമ്പാന്‍ പൊതുവാള്‍ എന്നിവരും സംബന്ധിച്ചു.
